លោកត្រាំរៀបចំពិសេសសម្រាប់ថ្ងៃបុណ្យជាតិ

ថ្ងៃទី ០៦ ខែ កក្កដា ឆ្នាំ ២០១៩

ម៉ោង ០៨:៣០

សហរដ្ឋអាមេរិក ៖ ទោះមានភ្លៀងផ្គរក៏មិនអាចរារាំងប្រធានាធិបតីអាមេរិកលោកដូណាល់ត្រាំ ក្នុងការរៀបចំជាពិសេសនូវទិវាបុណ្យឯករាជ្យជាតិអាមេរិកថ្ងៃទី៤កក្កដាដែរ។ ដូចបំណងនាថ្ងៃបុណ្យជាតិ៤កក្កដា មានពិធិហែក្បួនព្យុហយាត្រាយោធាមួយ ដោយមានរថក្រោះមួយចំនួននិងការហោះហើររបស់កងយន្តហោះ។

នោះជាបំណងរបស់ត្រាំដែលបង្ហាញពេលលោកទៅកាន់បារាំង ចូលរួមក្នុងពិធីព្យុហយាត្រាយោធា នាថ្ងៃបុណ្យជាតិបារាំង១៤កក្កដាឆ្នាំ២០១៧។ នៅពីក្រោយកញ្ចក់បាញ់មិនឆ្លុះដែលដាមដោយតំណក់ភ្លៀង លោកត្រាំបានទស្សនាការហោះហើរជាក្បួននៃកងយន្តហោះ ដែលហោះហើរពីលើរដ្ឋធានីសហព័ន្ធ ដោយដៃកាន់ក្បាលមេក្រូថ្លែងអស់ពេល៤៧នាទី។

លោកលើកពីប្រវត្តិសាស្ត្រនិងភាពអង់អាចក្លាហានរបស់ពួកអ្នកចម្បាំងអាមេរិក និងសរសើរដល់កម្លាំងយោធាអាមេរិក ដែលខ្លាំងជាងគេបំផុតលើផែនដីយើងនេះ ហើយសរសើរដល់កងកម្លាំងគ្រប់ប្រភេទ។ លោកថាអនាគតជារបស់យើង យើងនៅតែខ្លាំង មានមោទនភាពនិងសេរី។

មានការរិះគន់នានាចំពោះការរៀបចំរបស់លោកត្រាំឲ្យមានក្បួនព្យុហយាត្រាយោធា ពិសេសបណ្ដាសមាជិកសភានៃគណបក្សប្រជាធិបតេយ្យ ដែលលើកជាពិសេសពិការចំណាយប្រាក់អស់ច្រើន ហើយការធ្វើបែបនោះក៏ព្រោះតែលោកត្រាំចង់ទាញយកចំណេញខាងនយោបាយ សម្រាប់ការបោះឆ្នោតប្រធានាធិបតីនាឆ្នាំ២០២០ខាងមុខ៕ (កែសម្រួលដោយ ៖ បុប្ផា)